పల్స్‌ పోలియో విజయవంతం చేయండి

పాడేరు, న్యూస్‌టుడే: మార్చి మూడో తేదీన పల్స్‌ పోలియో చుక్కల కార్యక్రమం విజయవంతం చేయాలని కలెక్టర్‌ విజయసునీత పేర్కొన్నారు. జిల్లాలో ఐదేళ్లలోపు వయసున్న పిల్లలందరికీ పోలియో చుక్కలు వేయించాలని చెప్పారు. శుక్రవారం ఐటీడీఏ సమావేశ మందిరంలో దీనికి సంబంధించిన గోడపత్రికలను ఐడీడీఏ పీవో అభిషేక్‌, జేసీ భావన, డీఎంహెచ్‌వో జమాల్‌బాషా తదితరులతో కలిసి ఆవిష్కరించారు. కలెక్టర్‌ మాట్లాడుతూ.. జిల్లాలో 1,15,860 మంది ఐదు సంవత్సరాలలోపు వయసు గల పిల్లలు ఉన్నారని గుర్తించామన్నారు. వారందరికీ పోలియో చుక్కలు వేయాలని సూచించారు. జిల్లాలో 2,402 బూత్‌లు ఏర్పాటు చేసినట్లు తెలిపారు. 77 సంచార వాహనాలు కేటాయించామని పేర్కొన్నారు. ఎస్డీసీ వీవీఎస్‌ శర్మ తదితరులు పాల్గొన్నారు.