ఐటీడీఏ నిబంధనలకు ప్రభుత్వం తూట్లు

రంపచోడవరం, న్యూస్‌టుడే: మన్యంలో గిరిజన సమస్యల పరిష్కార వేదికగా జరిగే ఐటీడీఏ పాలకవర్గ సమావేశాలను నిర్వహించకపోవడం దారుణమని మాజీ ఎమ్మెల్యే, తెదేపా సీనియర్‌ నాయకులు శీతంశెట్టి వెంకటేశ్వరరావు పేర్కొన్నారు. శుక్రవారం రంపచోడవరంలో ఆయన విలేకరులతో మాట్లాడారు. నియోజకవర్గంలో రెండు ఐటీడీఏలు ఉన్నాయని, ప్రతి మూడు నెలలకు ఒకసారి పాలకవర్గ సమావేశాలు నిర్వహించి అధికారులు, ప్రజాప్రతినిధుల సమక్షంలో చర్చించాల్సి ఉందన్నారు. ఏడాదిలో కనీసం రెండు సమావేశాలైనా నిర్వహించాల్సి ఉందని తెలిపారు. జగన్‌ సీఎం అయ్యాక ఒక్కసారి కూడా పాలకవర్గ సమావేశం నిర్వహించకపోవడం దారుణమన్నారు. జగన్‌ ప్రభుత్వం ఐటీడీఏల నిర్వహణ నిబంధనలకు తూట్లు పొడిచిందని విమర్శించారు. ఉప ప్రణాళిక నిధులు కూడా ఈ ప్రాంతంలో ఖర్చు చేయకపోవడం దుర్మార్గమైన చర్య అన్నారు. వెంటనే పాలకవర్గ సమావేశాలను నిర్వహించి సమస్యలను పరిష్కరించాలని శీతంశెట్టి డిమాండ్‌ చేశారు.