ఇంటర్‌ విద్యార్థి బలవన్మరణం

విశాఖపట్నం, న్యూస్‌టుడే: వ్యసనాలకు బానిసైన ఓ యువకుడు బలవన్మరణానికి పాల్పడినట్లు పీఎంపాలెం సీఐ వై.రామకృష్ణ తెలిపారు. ఆ వివరాలిలా.. శ్రీకాకుళం జిల్లా ఎచ్చెర్ల మండలానికి చెందిన ఓ తాపీమేస్త్రి మధురవాడ వాంబే కాలనీలో భార్య, పిల్లలతో నివసిస్తున్నాడు. పెద్ద కుమారుడు(18) ప్రయివేటు కళాశాలలో ఇంటర్‌ ద్వితీయ సంవత్సరం చదువుతున్నాడు. కొంత కాలంగా ఆన్‌లైన్‌ క్రీడలు, మద్యం తదితర దురలవాట్లకు బానిసయ్యాడు. ఈ క్రమంలో తోటి మిత్రుల వద్ద సైతం అప్పులు చేశాడు. ఈ నేపథ్యంలో కొంత కాలంగా కళాశాలకు వెళ్లకుండా చదువుకు దూరమయ్యాడు. బుధవారం ఉదయం ఇంట్లో ఎవరూ లేని సమయం చూసి పడక గదిలో ఫ్యాన్‌ హుక్కుకు ఉరేసుకుని ఆత్మహత్యకు పాల్పడ్డాడు. ఈ ఘటనపై మృతుడి తండ్రి ఫిర్యాదు మేరకు కేసు నమోదు చేసి దర్యాప్తు చేస్తున్నట్లు సీఐ పేర్కొన్నారు.