విజయవాడ తూర్పులో వైకాపాకు షాక్.. తెదేపా గూటికి ఎంవీఆర్ చౌదరి

ఎంవీఆర్‌ చౌదరిని పార్టీలోకి ఆహ్వానిస్తున్న నారా లోకేశ్‌

పటమట, న్యూస్‌టుడే: తూర్పు నియోజకవర్గంలో వైకాపాకు షాకుల మీద షాకులు తగులుతున్నాయి. ఇప్పటికే పలువురు వైకాపా నాయకులు తెదేపాలోకి చేరగా తాజాగా విజయవాడ తూర్పు నియోజకవర్గానికి చెందిన సీనియర్‌ వైకాపా నేత ఎంవీఆర్‌ చౌదరి తెదేపా తీర్థం పుచ్చుకున్నారు. ఆయన గతంలో పార్టీ తూర్పు నియోజకవర్గ సమన్వయకర్తగా కొంతకాలం పనిచేశారు. విజయవాడ పార్లమెంట్‌ తెదేపా అభ్యర్థి కేశినేని శివనాథ్‌(చిన్ని) సహకారంతో సోమవారం ఉండవల్లిలో తెదేపా జాతీయ ప్రధాన కార్యదర్శి నారా లోకేష్‌ సమక్షంలో ఎంవీఆర్‌ చౌదరి తన అనుచరులతో కలిసి తెదేపాలోకి చేరారు. లోకేశ్‌ కండువా కప్పి ఆయన్ని పార్టీలోకి ఆహ్వానించారు. లోకేశ్‌ మాట్లాడుతూ వచ్చే ఎన్నికల్లో పార్టీ గెలుపు కోసం పనిచేయాలని, అధికారంలోకి వచ్చిన తర్వాత తగిన ప్రాధాన్యం ఇస్తామని పేర్కొన్నారు. ఎంవీఆర్‌ చౌదరి మాట్లాడుతూ విజయవాడలో తెదేపా అభ్యర్థుల గెలుపు కోసం కృషి చేస్తానని వెల్లడించారు.