సీపీఆర్‌పై అవగాహన అవసరం

ఈనాడు, అమరావతి: ప్రాణాపాయ స్థితిలో ఉన్నవారిని రక్షించడానికి సామాన్య ప్రజలకు కూడా సీపీఆర్‌పై అవగాహన తప్పనిసరి అని ఆంధ్రప్రదేశ్‌ నర్సెస్, మిడ్‌వైవ్స్‌ కౌన్సిల్‌ (ఏపీఎన్‌ఎమ్‌సీ) రిజిస్ట్రార్‌ కె.సుశీల పేర్కొన్నారు. విజయవాడలో ఈనెల 5న ఆరేళ్ల బాలుడు సాయికి నడిరోడ్డు మీద సీపీఆర్‌ చేసి ప్రాణాలు కాపాడిన మెడ్‌సీ ప్రసూతి వైద్య నిపుణురాలు రవళిని పాత ప్రభుత్వాసుపత్రి ప్రాంగణంలో ఉన్న డీఎమ్‌ఈ కార్యాలయంలో మంగళవారం సన్మానించారు. సుశీల మాట్లాడుతూ.. డా.రవళి అత్యవసరంగా స్పందించడం వల్ల ఒక బాలుడి ప్రాణం కాపాడగలిగారన్నారు. సమాజంలో ఎంత ఎక్కువ మందికి సీపీఆర్‌పై అవగాహన ఉంటే అంతే ఎక్కువగా ప్రాణనష్టాన్ని నివారించవచ్చన్నారు. కార్యక్రమంలో డీఎమ్‌ఈ డి.వి.ఎస్‌.ఎల్‌ నరసింహం, ఐఆర్‌సీఎఫ్‌ ఛైర్మన్‌ డాక్టర్‌.చక్రరావు తదితరులు డా.రవళిని అభినందించి... ప్రశంసాపత్రం అందజేశారు.