విద్యుత్తు స్తంభాన్ని ఢీకొన్న ట్రాక్టర్‌

మట్టి అక్రమ రవాణా చేస్తుండగా ఘటన
తప్పిన పెనుప్రమాదం

పూరిల్లుపై పడిన స్తంభం

అవనిగడ్డ, న్యూస్‌టుడే: ఎన్నికల కోడ్‌ అమలులో ఉన్నా నియోజకవర్గంలో వైకాపా నాయకుల మట్టి అక్రమ తవ్వకాలు, తరలింపునకు అడ్డులేకుండాపోయింది. సరికదా అక్రమంగా మట్టి తరలిస్తున్న వాహనాలు ప్రజల ప్రాణాలకు ముప్పుగా పరిణమించాయి. ఇందుకు అవనిగడ్డలో గురువారం జరిగిన ఘటనే నిదర్శనం. స్థానిక తిప్పపాలం వద్ద అక్రమంగా మట్టి రవాణా చేస్తున్న ట్రాక్టర్‌.. గురువారం విద్యుత్తు  స్థంభాన్ని ఢీకొనడంతో స్తంభం విరిగి పక్కనే ఉన్న పూరిల్లుపై పడింది. విద్యుత్తు తీగలు తెగిపోవడంతో సరఫరా నిలిచిపోవడంతో పెనుప్రమాదం తప్పింది. స్తంభం విరిగిన చోట ఆ శాఖ అధికారులు గప్‌చిప్‌గా కొత్తది ఏర్పాటు చేసినట్టు తెలిసింది. దీనిపై కేసు పెట్టకుండా అధికార పార్టీ నాయకులు తెరవెనుక మంతనాలు జరుపుతున్నారని సమాచారం. ఇప్పటికైనా అధికారులు స్పందించి అక్రమ మట్టి, ఇసుక, బుసక తవ్వకాలను నివారించాలని పలువురు ప్రజలు కోరుతున్నారు.