వల్లభనేని వంశీని తరిమికొట్టిన తెదేపా శ్రేణులు

సామాజిక మాధ్యమాల్లో వీడియో వైరల్‌

తెదేపా శ్రేణుల ప్రతిఘటనతో రివర్స్‌లో వెనక్కి వెళ్లిపోతున్న వంశీ కారు 

విజయవాడ, న్యూస్‌టుడే : గన్నవరం వైకాపా ఎమ్మెల్యే అభ్యర్థి వల్లభనేని వంశీమోహన్‌ను ఈ నెల 13వ తేదీన.. ఎన్నికల పోలింగ్‌ రోజు తెదేపా శ్రేణులు తరిమికొట్టిన వీడియో సామాజిక మాధ్యమాల్లో వైరల్‌గా మారింది. గన్నవరం మండలం కేసరపల్లి జడ్పీ ఉన్నత పాఠశాలలోని పోలింగ్‌ కేంద్రం వద్దకు మధ్యాహ్నం 3 గంటల సమయంలో వైకాపా అభ్యర్థి వల్లభనేని వంశీమోహన్‌ వచ్చారు. అనుచరులతో కలిసి వచ్చిన ఆయన.. తెదేపా సీనియర్‌ నాయకుడు పొట్లూరి బసవరావు, ఇతర నాయకులపై దాడికి యత్నిస్తూ కవ్వింపు చర్యలకు పాల్పడ్డారు. ఆ సమయంలో ఒక్కసారిగా తెదేపా శ్రేణులు భారీగా చేరుకోవడంతో.. పోలీసుల సాయంతో నెమ్మదిగా తన కారును రివర్స్‌లో పోనిస్తూ అక్కడి నుంచి వంశీమోహన్‌ పరారయ్యారు. తాజాగా శనివారం ఆ వీడియోలు సామాజిక మాధ్యమాల్లో వైరల్‌గా మారాయి.