పెళ్లి పేరుతో యువతి మోసం

సూర్యారావుపేట, న్యూస్‌టుడే : పెళ్లి చేసుకుంటానని నమ్మించి నగలు, రూ.11లక్షల వరకు వసూలు చేసి.. వైద్యుడిని మోసం చేసిన ముగ్గురిపై సూర్యారావుపేట పోలీసులు కేసు నమోదు చేశారు. సూర్యారావుపేటకు చెందిన ఓ వైద్యుడు (40)కి 2019లో వివాహమైంది. మనస్పర్థల కారణంగా విడాకులు తీసుకున్నారు. ఆ తర్వాత ఒక మ్యారేజీ బ్యూరో వెబ్‌సైట్‌ ద్వారా అతడిని పెళ్లి చేసుకునేందుకు మైసూర్‌కు చెందిన డాక్టర్‌ పవిత్ర చెల్వురాజ్‌ (39) అనే యువతి ముందుకు వచ్చింది. ఈ ఏడాది ఆగస్టు 27న ముహూర్తం పెట్టుకున్నారు. పెళ్లి నిమిత్తం బంగారు ఆభరణాలు, వస్త్రాలు నిమిత్తం రూ.11లక్షలు వరకు వైద్యుడు చెల్లించారు. ఆగస్టు 11న డాక్టర్‌ పవిత్ర చెల్వురాజ్‌.. తాను వివాహం రద్దు చేసుకుంటున్నానని వాట్సాప్‌ మేసేజ్‌ పెట్టింది. దీంతో సదరు వైద్యుడు.. ఫోన్‌లో మాట్లాడేందుకు ప్రయత్నించాడు. కానీ అలా సాధ్యం కాకపోవడంతో సూర్యారావుపేట పోలీసులకు మంగళవారం ఫిర్యాదు చేశాడు. పోలీసులు డాక్టర్‌ పవిత్రతోపాటు మరో ఇద్దరిపై మోసం కేసు నమోదు చేసి దర్యాప్తు చేస్తున్నారు.