సీఐడీ కానిస్టేబుల్‌కు టోకరా

పెనమలూరు, న్యూస్‌టుడే: సీఐడీ కానిస్టేబుల్‌కు సైబర్‌ నేరగాళ్లు టోకరా వేశారు. పోలీసులు తెలిపిన వివరాల ప్రకారం.. యనమలకుదురుకు చెందిన ఎం.సురేష్‌ సీఐడీ కార్యాలయంలో కానిస్టేబుల్‌గా పనిచేస్తుంటారు. ఇతని ఫోన్‌కు ఈనెల 4వ తేదీన ఎస్‌బీఐ రివార్డ్స్‌ పాయింట్స్‌ను రెడీమ్‌ చేసుకోవాలంటూ ఓ మెస్‌జ్‌ వచ్చింది. దీంతో ఇతను ఈ లింక్‌ను క్లిక్‌ చేసి అందులో ఇతని యూజర్‌ నేమ్‌, పాస్‌వర్డ్‌ నొక్కారు. అనంతరం ఇతని బ్యాంకు ఖాతా నుంచి విడతల వారీగా రూ.1.25 లక్షలు డ్రా అయినట్లు సమాచారం రావడంతో మోసపోయినట్లు గుర్తించి గురువారం పెనమలూరు పోలీసులకు ఫిర్యాదు చేయగా కేసు నమోదు చేసి దర్యాప్తు చేస్తున్నారు.