కొడవలితో వైకాపా కార్యకర్త వీరంగం

కొడవలి పట్టుకొని వీధుల్లో తిరుగుతున్న వైకాపా కార్యకర్త కుళ్లాయప్ప

కనగానపల్లి,న్యూస్‌టుడే: సార్వత్రిక ఎన్నికలు ముగిసి వారం రోజులు కాకుండానే ప్రజలను భయబ్రాంతులకు గురి చేయడానికి గ్రామాల్లో వైకాపా నాయకులు వ్యూహం పన్నుతున్నారు. అమాయకులను రెచ్చగొట్టి మద్యం తాపించి ప్రజలపైకి ఉసిగొల్పడంతో ఓ వైకాపా కార్యకర్త కొడవలి చేతపట్టుకొని గ్రామ వీధులో వీరంగం సృష్టించాడు. కనగానపల్లి మండలం ఎలకుంట్లలో ఆదివారం సాయంత్రం వైకాపా కార్యకర్త కుళ్లాయప్ప మద్యం తాగి కొడవలి చేతపట్టుకొని తెదేపా వాళ్లను నరుకుతా అంటూ అర్ధగంట వీధుల్లో వీరంగం సృష్టించాడు. చేతిలో కొడవలి ఉండటంతో అతడిని ఎవరూ నిలువరించలేకపోయారు. గ్రామంలోని ప్రజలు భయాందోళన చెందారు. ఇంటి నుంచి బయటకు వస్తున్న తెదేపా కార్యకర్త బాలుపై దాడి చేయడానికి ప్రయత్నం చేయడంతో అక్కడున్న వారు అడ్డుకొని కొడవలి లాక్కొని పంపించేశారు. పోలీసులు అతనిని అదుపులోకి తీసుకొని పోలీస్‌ స్టేషనుకు తరలించినట్లు పోలీసులు తెలిపారు.