దత్తత గ్రామం అభివృద్ధి ఏదీ..?

వైకాపా నాయకులను ప్రశ్నించిన ప్రజలు

పెనుమూరు, న్యూస్‌టుడే: మా గ్రామాన్ని డిప్యూటీ సీఎం నారాయణస్వామి దత్తత తీసుకుని అభివృద్ధి చేస్తానని మూడేళ్ల క్రితం హామీ ఇచ్చారు. ఆ సమయంలో జిల్లా, మండల స్థాయి అధికారులను సైతం గ్రామానికి తీసుకువచ్చి అభివృద్ధికి మాట ఇచ్చారు. ఆ తరవాత ఇప్పటివరకు పట్టించుకోలేదు. ప్రస్తుతం ఎన్నికలు రావడంతో ఇప్పుడు వచ్చారని చిప్పారపల్లె పంచాయతీ పాళ్యం యానాదికాలనీ ప్రజలు వైకాపా నాయకులను ప్రశ్నించారు. ఎన్నికల ప్రచారంలో భాగంగా వైకాపా జిల్లా ప్రధాన కార్యదర్శి దయాసాగర్‌రెడ్డి, ఎంపీపీ హేమలత, జడ్పీటీసీ దొరస్వామి తదితరులు శుక్రవారం పాళ్యంయానాది కాలనీకి ప్రచార నిమిత్తం వెళ్లారు. ఆ సమయంలో గ్రామ ప్రజలు ఆనాటి హామీలను నాయకుల దృష్టికి తీసుకువచ్చారు. రహదారి సౌకర్యం లేదని, పక్కా ఇళ్లు అసంపూర్తిగా ఉన్నాయిన ప్రశ్నించారు. డిప్యూటీ సీఎం నారాయణస్వామి అంతవరకు ప్రచారంలో పాల్గొని ఇక పాళ్యం యానాది కాలనీకి వెళ్లే సమయంలో తిరుపతిలో పని ఉందని వెళ్లిపోయినట్లు సమాచారం.