పెళ్లి మండపంలో వధువు అపహరణకు యత్నం

కారం చల్లి దాడి చేశారని ఫిర్యాదు

కడియం, న్యూస్‌టుడే: వివాహ వేడుకలో కారం చల్లి నవవధువును అపహరించే ప్రయత్నం జరిగిన ఘటన కడియం మండలం, కడియంలో చోటుచేసుకుంది. ఆ మేరకు కడియం సీఐ తులసీధర్‌ తెలిపిన వివరాల ప్రకారం.. నంద్యాల జిల్లా చాగలమర్రి మండలం, గొడిగనూరు గ్రామానికి చెందిన గంగవరం స్నేహ, కడియం గ్రామానికి చెందిన బత్తిన వెంకటనందు కలిసి నరసరావుపేటలోని ఓ కళాశాలలో పశువైద్యంలో డిప్లొమా చదివారు. ఆ క్రమంలో ఇద్దరి మధ్య పరిచయం పెరిగి ప్రేమకు దారితీయడంతో ఈ నెల 13న విజయవాడలోని దుర్గగుడిలో వివాహం చేసుకున్నారు. అనంతరం కడియం వచ్చి బత్తిన వెంకటనందు తన ఇంట్లో చెప్పగా పెద్దలు అంగీకరించి, బంధువుల సమక్షంలో మరోసారి వివాహం చేసేందుకు ఈ నెల 21న ముహూర్తం నిర్ణయించారు. అదే విషయాన్ని వధువు తన తల్లిదండ్రులకు తెలిపింది. కడియంలోని ఓ ఫంక్షన్‌ హాలులో ఆదివారం తెల్లవారు జామున వివాహ ప్రక్రియ జరుగుతుండగా వధువు తరఫున వాళ్లు పద్మావతి, చరణ్‌కుమార్‌, చందు, నక్కా భరత్‌ ఒక్కసారిగా ప్రవేశించి అక్కడున్న వారిపై కారంచల్లి స్నేహను అపహరించేందుకు ప్రయత్నించారు. దీంతో వెంకటనందు వారిని అడ్డుకున్నారు. ఈ దాడిలో బత్తిన వీరబాబుకు తీవ్రంగా గాయాలు కాగా చికిత్స నిమిత్తం రాజమహేంద్రవరం ప్రభుత్వాసుపత్రికి తరలించారు. ఆ మేరకు దాడి, అపహరణ, బంగారం చోరీ తదితర ఫిర్యాదలపై కేసు నమోదు చేసి దర్యాప్తు చేస్తున్నామని సీఐ తెలిపారు.