విద్యుదాఘాతంతో మహిళ మృతి

అనపర్తి గ్రామీణం, న్యూస్‌టుడే: విద్యుదాఘాతంలో మేడవరపు రామతారకం(55) అనే మహిళ మృతి చెందింది. ఈ ఘటన అనపర్తి మండలం కుతుకులూరులోని కుటేశ్వరకాలనీలో శుక్రవారం చోటు చేసుకుంది. పోలీసుల వివరాల ప్రకారం.. కుటేశ్వరకాలనీలో గతంలో ఓ వైకాపా నాయకుడు బస్టాండ్‌ నిర్మించారు. దానికి పక్కనే ఉన్న ట్రాన్స్‌ఫార్మర్‌ నుంచి విద్యుత్తు సరఫరా తీగ ఏర్పాటు చేశారు. అయితే కుటేశ్వరస్వామి ఆలయం వెనుక ఉన్న నాగుల పుట్టపై ఏర్పాటు చేసిన ఇనుప కంచెపై ఈ విద్యుత్తు తీగ పడింది. అదే సమయంలో రామతారకం ఇంట్లో చెత్తను పారవేసేందుకు వెళ్లి ఇనుప కంచెను పట్టుకోవడంతో ఆమె విద్యుదాఘాతానికి గురై మృతి చెందింది. దీంతో ఆమె కుమారుడు ట్రాన్స్‌ఫార్మర్‌ నుంచి అనధికారికంగా విద్యుత్తు సరఫరా చేసిన వారిపై చర్యలు తీసుకోవాలని ఫిర్యాదు చేశారు. దానిపై కేసు నమోదు చేసి దర్యాప్తు చేస్తున్నట్లు ఎస్సై రామారావు తెలిపారు.