రావణబ్రహ్మపై ఊరేగిన సత్యదేవుడు

అన్నవరం, న్యూస్‌టుడే: అన్నవరం సత్యదేవునికి సోమవారం రాత్రి రావణ బ్రహ్మ వాహన సేవను వైభవంగా నిర్వహించారు. కల్యాణోత్సవాల్లో భాగంగా జరిగిన గ్రామోత్సవాన్ని దేవస్థానం కమిటీ ఛైర్మన్‌ ఐవీ రోహిత్‌ ప్రారంభించారు.  ఈ సందర్భంగా ఏర్పాటైన వివిధ సాంస్కృతిక కార్యక్రమాలు ఆకట్టుకున్నాయి. దర్బారు మండపంలో ప్రవేశ స్థాలీపాక హోమాలు నిర్వహించారు. అనంతరం రాత్రి 7 గంటలకు ఉత్సవమూర్తులను తూర్పురాజగోపురం వద్దకు తోడ్కొని వచ్చి అర్చకులు అరుంధతీ నక్షత్ర దర్శనం చేయించారు. 
మంగళవారం మధ్యాహ్నం 2.30 గంటల నుంచి సదస్యం, పండిత సత్కారం (వేద సభ), రాత్రి 9 గంటల నుంచి పొన్న వాహనసేవ నిర్వహించడానికి అధికారులు ఏర్పాటు చేశారు. 
సూర్య భగవానుడికి పూజలు: ఆదివారం రాత్రి జరిగిన సత్యదేవుని కల్యాణానికి తదుపరి కార్యక్రమాలకు ఎటువంటి ఆటంకమూ లేకుండా వరుణుడు కరుణించడం, కల్యాణం కనుల పండువగా పూర్తి కావడంతో సోమవారం తూర్పురాజగోపురం వద్ద దేవాదాయశాఖ కమిషనర్‌ సత్యనారాయణ, ఈవో రామచంద్రమోహన్, వైదిక బృందం సూర్య భగవానుడికి బూర్లు పైకి విసిరి నైవేద్యంగా సమర్పించారు.