లారీ నడుపుతుండగా ఆగిన గుండె

నరసింహులు (పాత చిత్రం) 

దేవరపల్లి: లారీ నడుపుతుండగా అస్వస్థతకు గురై డ్రైవర్‌ మృతిచెందిన ఘటన దేవరపల్లి మండలంలో చోటు చేసుకుంది. పోలీసులు తెలిపిన వివరాల ప్రకారం.. దేవరపల్లిలోని నిమ్మలపాటి దిబ్బకు చెందిన బోగిరెడ్డి నరసింహులు(57)కు భార్య, కుమారుడు, వివాహమైన కుమార్తె ఉన్నారు. ఆయనకు రెండు లారీలు ఉన్నాయి. వాటిని నడుపుతూ జీవనం సాగిస్తున్నారు. శుక్రవారం ఉదయం నరసింహులు లారీలో బయలుదేరారు. యర్నగూడెం వెయింగ్‌ బ్రిడ్జ్‌ వద్ద వాంతి చేసుకున్నారు. అనంతరం స్టీరింగ్‌ మీద పడిపోయారు. తోటి డ్రైవర్‌కు ఫోన్‌ చేసి చెప్పారు. దేవరపల్లి ప్రభుత్వ ఆసుపత్రికి తీసుకెళ్లగా వైద్యులు పరిశీలించి మృతిచెందినట్లు నిర్ధారించారు. గుండెపోటులతో మృతిచెంది ఉండొచ్చని ఆయన కుమారుడు సతీష్‌ ఇచ్చిన ఫిర్యాదుపై కేసు నమోదు చేశామని ఎస్సై శ్రీహరిరావు తెలిపారు. ఇంటిపెద్ద దూరమవ్వడంతో కుటుంబ సభ్యులు తీవ్ర విషాదంలో మునిగిపోయారు.