శిశుగృహ ప్రహరీ కూలి పిల్లల ఆందోళన

శిశుగృహలో పిల్లలతో అగ్నిమాపక సిబ్బంది

రాజమహేంద్రవరం నగరపాలక సంస్థ, దానవాయిపేట: రాజమహేంద్రవరం మహిళా కళాశాల ఎదురుగా బాల సదనానికి చెందిన గోడ మంగళవారం రాత్రి భారీ వర్షానికి నాని కూలిపోయింది. దీంతో పక్కనే ఉన్న ప్రధాన కాలువలో వర్షపు నీరు లోపలకు చేరిపోవడంతో భవనం కింది భాగం నీట మునిగింది. ఈ భవనంలో 15 మంది పిల్లలు ఉన్నారు. వెంటనే సిబ్బంది అగ్నిమాపక శాఖకు సమాచారం అందించారు. వారు వచ్చి సహాయక చర్యలు చేపట్టారు. వారిని పై భాగంలో షెడ్డు ఉంటే అక్కడకు చేర్చారు. దీంతో అందరూ ఊపిరిపీల్చుకొన్నారు.

ముంపు నీటిలో చిక్కుకున్న కారు, బస్సు: తుపాను ప్రభావంతో నగరంలో మంగళవారం రాత్రి 11 గంటల సమయంలో కురిసిన భారీ వర్షానికి హైటెక్‌ బస్టాండ్‌ వద్దకు భారీగా వర్షపు నీరు చేరింది. అదే సమయంలో అటుగా వెళ్తున్న కారు, ఆర్టీసీ బస్సు ముంపులో చిక్కుకుపోయాయి. మున్సిపల్‌ సిబ్బంది, అగ్నిమాపక యంత్రాంగం అక్కడకు చేరుకుని తాళ్ల సాయంతో కారును బయటకు తెచ్చారు. బస్సులో ఉన్న వారిని సురక్షితంగా తరలించారు.