పంట నష్టంపై సమగ్ర సర్వే

రైతులతో మాట్లాడుతున్న వ్యవసాయ శాఖ జిల్లా అధికారి విజయ్‌కుమార్‌

గొల్లప్రోలు, న్యూస్‌టుడే: తుపాను ప్రభావంతో కురిసిన భారీ వర్షాలకు వాటిల్లిన పంట నష్టంపై సమగ్ర సర్వే నిర్వహించి బాధిత రైతులకు పరిహారం అందేలా చర్యలు తీసుకుంటున్నట్లు వ్యవసాయ శాఖ జిల్లా అధికారి ఎన్‌.విజయ్‌కుమార్‌ చెప్పారు. వర్షాలతో ముంపునకు గురైన పంటలను అధికారులతో కలిసి బుధవారం ఆయన పరిశీలించారు. గొల్లప్రోలు, చేబ్రోలు, చెందుర్తి గ్రామాల్లో పర్యటించి రైతులతో మాట్లాడారు. కౌలు రైతులే అధికంగా పంటలు నష్టపోయారని, వీరికి సీసీఆర్‌ కార్డులు లేవని రైతులు సమస్యను వివరించారు.  ఈక్రాప్‌ ఎవరి పేరున నమోదయిందో వారికే పరిహారం అందే అవకాశం ఉందని ఆయన స్పష్టం చేశారు. వ్యవసాయ శాఖ ఏడీ పి.స్వాతి, మండల వ్యవసాయ అధికారి సత్యనారాయణ, సిబ్బంది పాల్గొన్నారు.