రాజకీయ పార్టీలు చురుకైన పాత్ర పోషించాలి

వి.ఎల్‌.పురం(రాజమహేంద్రవరం): జిల్లాలో 18-19 ఏళ్ల యువతను కొత్త ఓటర్లుగా నమోదు చేయించే విషయంలో రాజకీయ పార్టీలు చురుకైన పాత్ర పోషించాలని కలెక్టర్‌ మాధవీలత, జేసీ తేజ్‌భరత్‌, డీఆర్వో నరసింహులు సూచించారు. బుధవారం సాయంత్రం కలెక్టరేట్‌లో ఆయా పార్టీల ప్రతినిధులతో సమావేశం నిర్వహించారు. ఈ సందర్భంగా కలెక్టర్‌ మాట్లాడుతూ ఓటర్ల జాబితా పరిశీలన, ఫారం-6, 7, 8 స్వీకరణ కోసం ఈ నెల 2, 3 తేదీల్లో నిర్వహించిన ప్రత్యేక శిబిరాల్లో మొత్తం 17,924 దరఖాస్తులు వచ్చాయన్నారు. 47 పోలింగ్‌ కేంద్రాల పరిధిలో పదికి మించి ఓటర్లు ఉన్న 66 డోర్‌ నంబర్లలో 787 మంది ఉన్నారని, వాటిని పరిశీలన చేస్తున్నామన్నారు. ఈ నెల 8న ఎన్నికల ప్రత్యేక పరిశీలకులుగా సీనియర్‌ ఐఏఎస్‌ అధికారి ఎన్‌.యువరాజ్‌ జిల్లాకు రానున్నారని, ఆ రోజు రాజకీయ పార్టీల ప్రతినిధులు, అధికారులతో సమీక్ష నిర్వహిస్తారని తెలిపారు. పారదర్శకంగా తుది జాబితా రూపకల్పనలో రాజకీయ పార్టీల ప్రతినిధులు కీలక బాధ్యతలు నిర్వహించాల్సి ఉంటుందన్నారు.