ఆగిన 108.. ఆదుకున్న ‘కవచం’!

సీతానగరం: పాముకాటుకు గురైన యువకుడ్ని అత్యవసర చికిత్స కోసం రాజమహేంద్రవరం ప్రభుత్వాసుపత్రికి తరలించే సమయంలో మరమ్మతులతో 108 వాహనం నిలిచింది. దీంతో కుటుంబసభ్యులు, పీహెచ్‌సీ వైద్యసిబ్బంది ఆందోళనకు గురయ్యారు. సీతానగరానికి చెందిన తవిటిక ప్రసన్నకుమార్‌(25)ను చేలో ఉండగా శనివారం పాముకాటుకు గురయ్యాడు. బాధితుడ్ని ద్విచక్రవాహనంపై స్థానిక పీహెచ్‌సీకి తరలించారు. అత్యవసర వైద్యం కోసం రాజమహేంద్రవరం ప్రభుత్వాసుపత్రికి 108లో బయలుదేరుతుండగా పీహెచ్‌సీ ప్రాంగణంలోనే 108 నిలిచిపోయింది. ఎంతసేపు ప్రయత్నించినా సెల్ఫ్‌ కావడం లేదు. స్థానికులంతా కలిసి వాహనాన్ని నెట్టే ప్రయత్నం చేసినా ఫలించలేదు. శ్రీరామనగరం సద్గురు చిట్టిబాబాజీ సంస్థానం నిర్వహిస్తున్న ఉచిత అంబులెన్సు ‘కవచం’ పీహెచ్‌సీ సిబ్బంది ఫోన్‌ చేసి అందులో బాధితుడ్ని ఎక్కించారు. సకాలంలో ఉచిత అంబులెన్సు రావడంతో ప్రభుత్వాసుపత్రికి చేరగలిగామని బాధితుడి సోదరుడు రాజు తెలిపారు. తరచుగా 108 అంబులెన్సు నిలిచిపోవడం వల్ల ఇబ్బందులు పడుతున్నామని పలువురు వాపోతున్నారు.