జెండా సభకు.. సందడిగా పయనం

మండపేటలో బస్సుకు జెండా ఊపుతున్న ఎమ్మెల్యే జోగేశ్వరరావు

అమలాపురం కలెక్టరేట్‌, న్యూస్‌టుడే : తెలుగు జన విజయకేతనం ‘జెండా’ పేరిట తాడేపల్లిగూడెంలో తెదేపా-జనసేన సంయుక్త ఆధ్వర్యంలో బుధవారం నిర్వహించిన బహిరంగ సభకు డాక్టర్‌ బీఆర్‌ అంబేడ్కర్‌ కోనసీమ జిల్లా నుంచి ఇరు పార్టీల నాయకులు, కార్యకర్తలు భారీగా తరలి వెళ్లారు. జిల్లాలో ఏడు అసెంబ్లీ నియోజకవర్గాలకుగాను ఇప్పటికే నాలుగింట తెదేపా అధిష్ఠానం అభ్యర్థులను ఖరారు చేయడంతో వారు భారీ సంఖ్యలో అనుచరులతో సభకు తరలి వెళ్లారు. మండపేట, అమలాపురం, కొత్తపేట, ముమ్మిడివరం  నియోజకవర్గాల నుంచి ఎమ్మెల్యే వేగుళ్ల జోగేశ్వరరావు, ఇన్‌ఛార్జులు అయితాబత్తుల ఆనందరావు, బండారు సత్యానందరావు, దాట్ల బుచ్చిబాబు ఆధ్వర్యంలో అధిక సంఖ్యలో తెలుగు తమ్ముళ్లు తాడేపల్లిగూడెం సభకు తరలి వెళ్లారు. అమలాపురం నియోజకవర్గం నుంచి శెట్టబత్తుల రాజబాబు, డీఎంఆర్‌ శేఖర్‌ ఆధ్వర్యంలో జనసైనికులు భారీ సంఖ్యలో ర్యాలీగా తాడేపల్లిగూడెం వెళ్లారు. జిల్లా వ్యాప్తంగా అన్ని  మండలాల నుంచి అధిక సంఖ్యలో తెదేపా, జనసేన నాయకులు, కార్యకర్తలు బస్సులు, ప్రత్యేక వాహనాల్లో తరలి వెళ్లారు.

అమలాపురం గడియార స్తంభం నుంచి ర్యాలీగా జనసేన శ్రేణులు