30,714 మంది రైతులకు సున్నావడ్డీ రాయితీ

నమూనా చెక్కుతో అధికారులు, రైతులు

వి.ఎల్‌.పురం(రాజమహేంద్రవరం), న్యూస్‌టుడే: జిల్లాలోని 30,714 మంది రైతుల బ్యాంకు ఖాతాలకు రూ.5,85,69,974 సున్నావడ్డీ రాయితీని ప్రభుత్వం జమ చేసినట్లు కలెక్టర్‌ మాధవీలత తెలిపారు. పీఎం కిసాన్‌- రైతుభరోసా పథకం, సున్నావడ్డీ పంట రుణాల పథకం కింద బుధవారం తాడేపల్లి క్యాంపు కార్యాలయం నుంచి ముఖ్యమంత్రి జగన్‌మోహన్‌రెడ్డి లబ్ధిదారుల ఖాతాలకు ఆర్థిక సహాయం జమచేయగా జిల్లాస్థాయి కార్యక్రమాన్ని కలెక్టరేట్‌లో నిర్వహించారు. కలెక్టర్‌ మాట్లాడుతూ 2021-22 రబీ సీజన్‌లో 17,409 మంది తీసుకున్న పంట రుణాలకు సంబంధించి సున్నావడ్డీ రాయితీ రూ.3,40,08,955, 2022 ఖరీఫ్‌ సీజన్‌లో 13,305 మంది పొందిన పంట రుణాలకు రాయితీగా రూ.2,45,61,019 ప్రభుత్వం అందించినట్లు తెలిపారు. మూడో విడతగా పీఎం కిసాన్‌- వైఎస్సార్‌ రైతుభరోసా పథకం కింద 1,41,216 మందికి రూ.28.39 కోట్లను ప్రభుత్వం జమ చేసిందన్నారు. జేసీ తేజ్‌భరత్‌, జిల్లా వ్యవసాయ అధికారి మాధవరావు పాల్గొన్నారు.