వ్యర్థాలు వదిలేసి.. పనులు ముగించేసి..

బ్యారేజీ ఫుట్‌పాత్‌పై కాంక్రీటు వ్యర్థాలు

ధవళేశ్వరం, హుకుంపేట, న్యూస్‌టుడే: కాటన్‌ బ్యారేజీ రహదారి మరమ్మతులు పూర్తిచేసి ఈ నెల 17 నుంచి వాహనాల రాకపోకలకు అనుమతించారు. మరమ్మతుల పనులు పూర్తయి పది రోజలు గడిచినా ఫుట్‌పాత్‌ మీద వేసిన సిమెంటు, కాంక్రీటు వ్యర్థాలను తొలగించకుండా వదిలేశారు. దాంతో పాదచారులు నడిచేందుకు ఇబ్బందులు పడుతున్నారు. కొన్నిచోట్ల మొనదేలిన ఇనుప చువ్వలు పైకి రావడంతో రాకపోకలు సాగించే వాహనచోదకులు ప్రమాదాల బారిన పడే అవకాశముంది. వాటిని తొలగించాలని కోరుతున్నారు.

ప్రమాదకరంగా మలుపు

కాటన్‌ బ్యారేజీ కూడలి నుంచి బ్యారేజీ పైకి వెళ్లేటప్పుటు ఎస్‌ ఆకార మలుపులో తరచూ ప్రమాదాలు జరుగుతున్నాయి. రహదారి మరమ్మతుల అనంతరం వాహనాల వేగం పెరిగింది. దాంతో ప్రమాదాలు జరుగుతున్నాయి. రహదారి మరమ్మతు పనుల్లో భాగంగా మలుపులో ఉన్న వేగనిరోధకాలను తొలగించారు. పనులు పూర్తయ్యాక తిరిగి వాటిని ఏర్పాటు చేయలేదు. దాంతో తరచూ ప్రమాదాలు జరుగుతున్నాయని స్థానికులు అంటున్నారు. ఇప్పటికైనా అధికారులు స్పందించి వేగనిరోధకాలు ఏర్పాటు చేయాలని కోరుతున్నారు.

రహదారిపై చొచ్చుకొచ్చిన ఇనుప చువ్వలు