‘సీఎం గురించి మాట్లాడే నైతిక హక్కు పవన్‌కు లేదు’

మంత్రి రాంబాబు

వి.ఎల్‌.పురం (రాజమహేంద్రవరం), న్యూస్‌టుడే: ముఖ్యమంత్రి జగన్‌మోహన్‌రెడ్డి గురించి మాట్లాడే నైతిక హక్కు జనసేన అధినేత పవన్‌ కల్యాణ్‌కు లేదని రాష్ట్ర జలవనరుల శాఖ మంత్రి అంబటి రాంబాబు అన్నారు. గురువారం రాజమహేంద్రవరంలో విలేకరుల సమావేశంలో ఆయన మాట్లాడుతూ తెదేపా-జనసేన పొత్తును ఎవరూ నమ్మే పరిస్థితి లేదన్నారు. తాడేపల్లిగూడెంలో జరిగిన ఉమ్మడి సభలో పవన్‌కల్యాణ్‌ మాటతీరు దారుణంగా ఉందన్నారు. చంద్రబాబును నమ్మి రాజకీయాల్లో బాగుపడిన వ్యక్తి ఒక్కరూ లేరని మంత్రి వ్యాఖ్యానించారు.

బి-ఫారం ఇచ్చేవరకు అభ్యర్థులు కారు

వైకాపా సమన్వయకర్తలంతా ఇన్‌ఛార్జులేనని, వీరు అభ్యర్థులు కావచ్చు..అక్కడక్కడ కాకపోవచ్చని అంబటి అన్నారు. బి-ఫారం వచ్చే వరకు సాంకేతికంగా ఎవరూ అభ్యర్థులు కాదన్నారు. బి.ఫారం ఇచ్చేటప్పుడు కొంచెం మార్పులు ఉండవచ్చన్నారు. ఏ పార్టీ నుంచి ఎవరు వచ్చినా వైకాపాలో చేర్చుకుంటామని, టికెట్‌ ఇస్తారా? లేదా? అనేది సీఎం నిర్ణయమని అన్నారు.