పేపరు మిల్లులో కార్మికుల మెరుపు సమ్మె

వేతన ఒప్పందం అమలుకు డిమాండ్‌ 

మిల్లు లోపల బైఠాయించి నిరసన వ్యక్తం చేస్తున్న కార్మికులు

వి.ఎల్‌.పురం(రాజమహేంద్రవరం), న్యూస్‌టుడే: రాజమహేంద్రవరం ఆంధ్రా పేపరు మిల్లులో కార్మికులు మెరుపు సమ్మెకు దిగారు. యాజమాన్యం వెంటనే వేతన ఒప్పందం(అగ్రిమెంట్‌) చేయాలని డిమాండ్‌ చేశారు. వేతన ఒప్పంద కాలపరిమితి పూర్తయి నాలుగేళ్లైనా కొత్త వేతన ఒప్పందం చేయకుండా యాజమాన్యం మొండి వైఖరి అవలంబించడాన్ని నిరసిస్తూ మంగళవారం సాయంత్రం మిల్లు లోపల.. పర్మినెంట్‌, కాంట్రాక్టు కార్మికులు బైఠాయించి ఆందోళన చేశారు. పాత వేతన ఒప్పందం 2020 జూన్‌ 30తో ముగిసినప్పటికీ ఆ తర్వాత కొత్త వేతన ఒప్పందం చేయకుండా యాజమాన్యం నిరంకుశంగా వ్యవహరిస్తోందని ఆరోపించారు. చట్టబద్ధంగా అనేక పద్ధతుల్లో పోరాడిన కార్మికులు నెల కిందట మిల్లులో ఉన్న 11 రిజిస్టర్డ్‌ కార్మిక సంఘాలు కలిసి సమ్మె నోటీసు ఇచ్చాయి. ఆ తరువాత ఏలూరు కార్మిక శాఖ జాయింట్‌ కమిషనర్‌ వద్ద యాజమాన్యానికి కార్మిక సంఘాలకు జరిగిన సంయుక్త సమావేశం(జాయింట్‌ మీటింగ్‌)లో కార్మిక శాఖ అధికారులు, యాజమాన్యం చేసిన సూచన మేరకు 11 సంఘాలు ఉమ్మడిగా వేతన ఒప్పందానికి సంబంధించిన డిమాండ్స్‌ అందజేశారు. అయినప్పటికీ యాజమాన్యం చర్చలకు పిలిచి వేతన ఒప్పందం చేయలేమని స్పష్టం చేసినట్లు కార్మికులు చెబుతున్నారు. దీంతో మళ్లీ కార్మిక శాఖ అధికారులను  ఆశ్రయించగా వేతన ఒప్పందం చేయమని యాజమాన్యానికి కార్మిక శాఖ జాయింట్‌ కమిషనర్‌ సూచించినప్పటికీ మిల్లు యాజమాన్యం పెడచెవిన పెట్టడంతో గత్యంతరం లేక ఆందోళన బాట పట్టాల్సి వచ్చిందని కార్మిక సంఘాల నాయకులు, కార్మికులు చెబుతున్నారు.