‘అనంత’ పరాభవం.. వీడియో వైరల్‌

గన్‌మెన్‌ సాయంతో మోటారు సైకిల్‌పై వెళ్లిపోతున్న ఎమ్మెల్సీ అనంత బాబు

ప్రత్తిపాడు: కాకినాడ జిల్లా ప్రత్తిపాడు మండలంలోని ధర్మవరంలో సోమవారం రాత్రి అంబేడ్కర్‌ విగ్రహానికి పూలమాల వేసిన ఎమ్మెల్సీ అనంత బాబును దళితులు ఘెరావ్‌ చేసిన సంఘటన తెలిసిందే. దళిత డ్రైవర్‌ను చంపి ఇప్పుడు ఓట్ల కోసం వచ్చి విగ్రహానికి దండేస్తావా అంటూ నిలదీయడమే గాక తరమడం సామాజిక మాధ్యమాల్లో మంగళవారం విస్తృతంగా వైరల్‌ అవుతోంది. కాకినాడ వైకాపా ఎంపీ అభ్యర్థి చలమలశెట్టి సునీల్‌, ప్రత్తిపాడు ఎమ్మెల్యే అభ్యర్థి వరుపుల సుబ్బారావుతో కలిసి ఈ గ్రామంలో ప్రచారానికి వచ్చిన ఎమ్మెల్సీ ఎస్సీ కాలనీలో అంబేడ్కర్‌ విగ్రహానికి పూలమాల వేయడాన్ని స్థానికులు తప్పుపట్టారు. దళితుడిని చంపిన వ్యక్తిని దళిత కాలనీలోకి ఎందుకు రానిచ్చారంటూ ఓ యువకుడు తీవ్ర పదజాలంతోనే నిరసన తెలిపాడు. గన్‌మెన్‌ల సాయంతో ద్విచక్ర వాహనంపై ఎమ్మెల్సీ పలాయనం చిత్తగించిన వీడియో వైరల్‌ అవుతోంది. కాగా ఈ పరాభవంతో ఎమ్మెల్సీ మంగళవారం ఎక్కడా ప్రచారంలో పాల్గొనలేదు.