జనం లేక బస్సులోనే జగన్‌

సత్తెనపల్లి తాలుకా సెంటర్‌లో జగన్‌ రోడ్‌ షోలో పలుచగా జనం

సత్తెనపల్లి: సత్తెనపల్లిలో సీఎం నిర్వహించిన బస్సు యాత్రకు స్పందన నామమాత్రమే. బస్సులు ఏర్పాటు చేసి, మద్యం, డబ్బు పంపిణీ చేసినా జనం రాలేదు. కొన్నిచోట్ల జగన్‌ కూడా బస్సులోనే ఉండిపోయారు. పట్టణంలో సగం దూరమే రోడ్‌షో నిర్వహించి మమ అనిపించారు. సత్తెనపల్లి మండలం ధూళిపాళ్ల నుంచి శుక్రవారం యాత్ర మొదలైంది. మధ్యాహ్నం 12.35 గంటల సమయంలో పట్టణంలోకి ప్రవేశించారు. అక్కడ్నుంచి తాలుకా సెంటర్‌ వరకు ఓ మోస్తరుగా జనం దారివెంట ఉన్నారు. తాలుకా సెంటర్‌ దాటిన తర్వాత జనం తగ్గిపోయారు. బస్టాండ్‌ సమీపంలోకి రాగానే జగన్‌ బస్సుపై నుంచి కిందకు దిగిపోయారు. ఎక్కడా ఆయన నోరు మెదపలేదు. ఉ.10.30 గంటలకే పట్టణానికి వచ్చిన వైకాపా శ్రేణులు మండుటెండలో మాడిపోయాయి.