పంచాయతీ కార్యాలయంలో మామిడి పండ్ల వ్యాపారం

ఓ వైకాపా నాయకుడి నిర్వాకం

అమ్మకానికి ఉంచిన మామిడి పండ్లు ఇలా..

కొర్నెపాడు (వట్టిచెరుకూరు), న్యూస్‌టుడే: వట్టిచెరుకూరు మండలం కొర్నెపాడు గ్రామానికి చెందిన ఓ వైకాపా నాయకుడు తన మామిడి పండ్ల వ్యాపారానికి స్థానిక పంచాయతీ కార్యాలయాన్ని కేంద్రంగా చేసుకున్నారు. వర్షం కురుస్తుండడంతో ప్రధాన కూడలిలో ఉన్న పంచాయతీ కార్యాలయంలో మామిడి పండ్ల పెట్టెలను ఉంచి వ్యాపారం చేశారు. పనుల నిమిత్తం వచ్చే ప్రజలు, అధికారులు వెళ్లే దారి మూసి మామిడి పండ్ల బుట్టలు నిల్వ చేసి అమ్మకాలు చేపట్టారు. దీంతో కార్యాలయంలోకి వ్యక్తిగత అవసరాల నిమిత్తం ఇతరులు వెళ్లడానికి వీల్లేకుండా పోయింది. పంచాయతీ కార్యాలయంలో ఉంచిన మామిడి కాయలు బయటకు తరలించాలని, గ్రామ కార్యదర్శి కోటేశ్వరికి కొందరు స్థానికులు వినతిపత్రం అందించారు. సమస్యను ఎంపీడీవో శేషగిరిరావు దృష్టికి తీసుకెళ్లారు. మధ్యాహ్నం పంచాయతీ కార్యాలయానికి సిబ్బందితో కలిసి వెళ్లిన పంచాయతీ కార్యదర్శి కోటేశ్వరి భవనంలోని మామిడి పండ్లను పూర్తిగా తొలగించారు.