మద్యం దుకాణాలకు 144 సెక్షన్‌ వర్తించదా?

దాచేపల్లి, న్యూస్‌టుడే: ఎన్నికల పోలింగ్‌ రోజు, ఆ తర్వాత జరిగిన దాడులు, ఘర్షణల కారణంగా పల్నాడు జిల్లా వ్యాప్తంగా అయిదురోజులుగా పోలీసులు 144 సెక్షన్‌ అమలు చేస్తున్నారు. పట్టణంలోని దుకాణాలను పూర్తిగా మూయిస్తున్నారు. చిరు వ్యాపారుల పట్ల కఠినంగా వ్యవహరిస్తున్నారు. ప్రభుత్వ మద్యం దుకాణాలు, వైకాపా నాయకులకు చెందిన బార్‌ అండ్‌ రెస్టారెంట్లను మాత్రం వదిలేస్తున్నారు. మద్యం మత్తులోనే ఎక్కువగా గొడవలు జరుగుతాయన్న విషయం అందరికీ తెలిసిందే. పోలీసు అధికారులు మాత్రం పట్టించుకోకపోవడం అనుమానాలకు దారితీస్తోంది. నిత్యావసర దుకాణాలకు వర్తించిన 144 సెక్షన్‌ మద్యం దుకాణాలకు వర్తించదా అంటూ సామాన్యులు ప్రశ్నిస్తున్నారు.