గ్రానైట్‌ ముడిరాయి లారీల పట్టివేత

బల్లికురవ, సంతమాగులూరు, న్యూస్‌టుడే: గుంటూరు విజిలెన్స్‌ సీఐ శ్రీహరి తన బృందంతో సోమవారం బల్లికురవ పరిసర ప్రాంతాల్లో తనిఖీలు నిర్వహించారు. మల్లాయపాలెం సమీపంలోని ఈర్లకొండ గ్రానైట్‌ క్వారీల నుంచి ముడిరాయి తరలిస్తున్న రెండు లారీలను అదుపులోకి తీసుకున్నారు. వాటిలోని బిల్లులను పరిశీలించగా ఒక లారీపై తరలిస్తున్న ముడిరాయికి బిల్లులు లేకుండా ఉన్నట్లు గుర్తించారు. మరో లారీపై ఉన్న ముడిరాయికి బిల్లులోని కొలతకు భారీగా తేడాలు ఉండటంతో వాటిని స్వాధీనం చేసుకున్నారు. అనంతర వాటిని బల్లికురవ పోలీసులకు అప్పగించారు. సంతమాగులూరు మండలం గురిజేపల్లి సమీపంలోని క్వారీ నుంచి ముడిరాయి తరలిస్తున్న మరో లారీని స్వాధీనం చేసుకున్నారు. వీటన్నింటికీ కొలతల ఆధారంగా జరిమానా విధించనున్నట్లు సీఐ చెప్పారు.