ఇసుక తవ్వకాలు జరగకుండా 24 గంటలూ పర్యవేక్షణ

కొల్లిపర, న్యూస్‌టుడే: నిబంధనలకు విరుద్ధంగా ఇసుక తవ్వకాలు జరగకుండా 24 గంటలూ పర్యవేక్షించేలా బృందాలను ఏర్పాటు చేయాలని, నిరంతరం పర్యవేక్షించాలని జిల్లా కలెక్టర్‌ ఎం.వేణుగోపాలరెడ్డి ఆదేశించారు. ఆయన, జిల్లా ఎస్పీ తుషార్‌ దూడి, సంయుక్త కలెక్టర్‌ రాజకుమారి, తెనాలి సబ్‌ కలెక్టర్‌ ప్రఖర్‌జైన్, సహాయ కలెక్టర్‌ (శిక్షణ) పవార్‌స్వప్నిల్‌ జగన్నాథ్, ఇసుక కమిటీ ప్రతినిధులు సోమవారం కొల్లిపర మండలం బొమ్మవానిపాలెం, మున్నంగి ఇసుక రీచ్‌లను పరిశీలించారు. స్థానిక అధికారుల నుంచి వివరాలు సేకరించారు. నిబంధనల అమలుకు పక్కాగా చర్యలు తీసుకోవాలని, ఇందుకు అన్ని విభాగాల అధికారులు సమన్వయంతో సాగాలని సూచించారు. అక్రమ ఇసుక తవ్వకాలపై జిల్లా స్థాయిలో 24 గంటలూ పని చేసేలా కంట్రోల్‌ రూం ఏర్పాటు చేసినట్లు చెప్పారు. ఫిర్యాదులను ‘0863-2234301’ నంబరుకు తెలియచేయవచ్చని కలెక్టర్‌ వివరించారు.