ప్రజావ్యతిరేక పాలనతో పతనం తప్పదు

శిబిరంలో రైతుల నిరసన

తుళ్లూరు, న్యూస్‌టుడే: ప్రజల ఆకాంక్షలకు భిన్నంగా వ్యవహరించిన ఏ పార్టీకైనా పతనం తప్పదని రాజధాని రైతులు పేర్కొన్నారు. ఇటీవల తెలంగాణలో జరిగిన ఎన్నికల్లో భారాస అధినేత, మాజీ ముఖ్యమంత్రి కేసీఆర్‌ ఓటమే దానికి నిదర్శనమన్నారు. మూడు రాజధానుల నిర్ణయాన్ని వ్యతిరేకిస్తూ అమరావతిలో అన్నదాతలు చేస్తున్న నిరసనలు సోమవారానికి 1,448వ రోజుకు చేరాయి. ఈ సందర్భంగా మందడం శిబిరంలో రైతులు మాట్లాడుతూ రాష్ట్రానికి ఏకైక రాజధానిగా అమరావతి ఉండాలని ప్రజలు కోరుకుంటుంటే సీఎం జగన్‌ మాత్రం మూడు రాజధానులంటూ మూర్ఖంగా ముందుకు వెళుతున్నారని ఆగ్రహం వ్యక్తం చేశారు. అక్రమ అరెస్టులతో దౌర్జన్య పాలన చేస్తూ అభివృద్ధిని పట్టించుకోని వైకాపాకు రానున్న ఎన్నికల్లో పరాభవం తప్పదని హెచ్చరించారు. వెంకటపాలెం, మందడం, వెలగపూడి, ఉద్దండరాయునిపాలెం, దొండపాడు, తుళ్లూరు, నెక్కల్లు, అనంతవరం, తాడికొండ తదితర గ్రామాల్లో నిరసనలు కొనసాగాయి.