మిగ్‌జాం బీభత్సం

కలెక్టరేట్‌లో విద్యుత్తు సరఫరాకు అంతరాయం

కలెక్టరేట్‌(గుంటూరు), న్యూస్‌టుడే: మిగ్‌జాం తుపాను తీరం దాటిన తర్వాత బీభత్సం సృష్టించింది. కలెక్టరేట్‌లో చెట్ల కొమ్మలు విరిగి విద్యుత్తు తీగలపై పడడంతో అవి తెగి స్తంభాలు నేలకొరిగాయి. దీంతో బుధవారం ఉదయాన్నే అగ్నిమాపక సిబ్బంది చెట్ల కొమ్మలను విద్యుత్తు స్తంభాలకు అడ్డం లేకుండా తొలగించారు. వెంటనే విద్యుత్తు సరఫరాను పునరుద్ధరించే పనులు చేపట్టారు. కలెక్టరేట్‌లోని సర్వే, వ్యవసాయం, మత్స్య, అటవీ శాఖ రేంజ్‌ కార్యాలయం, పంచాయతీ కార్యాలయం, రోడ్లు భవనాల శాఖ కార్యాలయాలకు విద్యుత్తు సరఫరా నిలిచిపోయింది. ఆయా కార్యాలయాల్లో ఉద్యోగులు విద్యుత్తు సరఫరా కోసం ఎదురుచూడసాగారు. గురువారం ఉదయానికి సరఫరాను పునరుద్ధరిస్తామని సిబ్బంది తెలిపినట్లు పలువురు ఉద్యోగులు చర్చించుకుంటున్నారు.