అంతర్జాతీయ శాండ్‌ ఆర్ట్‌ ఫెస్టివల్‌లో ప్రథమ స్థానం

తాడేపల్లి, న్యూస్‌టుడే: ఒడిశా రాష్ట్రంలోని కోణార్క్‌పూరి చంద్రబాగ్‌ బీచ్‌లో ఈ నెల ఒకటి నుంచి అయిదు వరకు జరిగిన అంతర్జాతీయ శాండ్‌ ఫెస్టివల్‌లో ఆంధ్రప్రదేశ్‌ రాష్ట్రానికి ప్రథమస్థానం లభించింది. గుంటూరు జిల్లా తాడేపల్లి పరిధిలోని సీతానగరానికి చెందిన బాలాజీ వరప్రసాద్‌ పోటీలో పాల్గొని అయిదు రోజుల పాటు ఎకో టూరిజం, మహిళా సాధికారత, అతిథి దేవోభవ తదితర సందేశాత్మక సైకత శిల్పాలు రూపొందించారు. ఇందుకు గానూ బుధవారం నిర్వహించిన బహుమతుల ప్రదానోత్సవంలో అంతర్జాతీయ స్థాయిలో ప్రథమస్థానం లభించినట్లు చిత్రకారుడు ‘న్యూస్‌టుడే’కు చరవాణి ద్వారా తెలిపారు. 2018, 2022లో ఆయన రాష్ట్రం తరఫున పోటీలో పాల్గొని రాష్ట్రాన్ని ప్రథమ స్థానంలో నిలిపారు.