యువకులను కాపాడిన పోలీసులు

అద్దంకి, న్యూస్‌టుడే : పోలీసులు ఏర్పాటు చేసిన బారికేడ్లను లెక్క చేయకుండా కారులో వాగు దాటేందుకు ప్రయత్నించిన ఇద్దరు యువకులను అద్దంకి పోలీసులు కాపాడారు. ఈ సంఘటన అద్దంకి నుంచి రేణంగివరం వెళ్లే దారిలో నల్లవాగు వద్ద మంగళవారం ఆర్ధరాత్రి దాటాక జరిగింది. అద్దంకి పట్టణ సీఐ రమేష్‌ వివరాల ప్రకారం.. ప్రకాశం జిల్లా పామురుకు చెందిన వెంకటేష్‌ తన స్నేహితుడితో కలసి కారులో రాజమండ్రి వెళ్తున్నారు. అద్దంకి దాటాక పోలీసులు వారిస్తున్నా కారులో నల్లవాగు దాటేందుకు ప్రయత్నించారు. ఈ క్రమంలోనే వాగు ఉద్ధృతికి కారు అదుపు తప్పి కొంచెం దూరం కొట్టుకుపోయింది. వెంటనే స్పందించిన పోలీసుల్లో ఒకరు తాడు కట్టుకుని కారు వద్దకు వెళ్లి వారిని బయటకు తీసుకువచ్చారు. అనంతరం కారును కూడా లాగారు. అద్దంకి తహసీల్దార్‌ సుబ్బారెడ్డి పోలీసులను అభినందించారు.