జడ్పీ ఆస్తుల పరిరక్షణకు ప్రాధాన్యం

జిల్లాపరిషత్తు(గుంటూరు), న్యూస్‌టుడే: మండలాల్లో జిల్లాపరిషత్తు ఆస్తుల పరిరక్షణకు ప్రాధాన్యం  ఇవ్వడంతోపాటు అన్యాక్రాంతమైన ఆస్తులు, భూములను గుర్తించి నివేదించాలని జిల్లా పరిషత్తు ఛైర్‌పర్సన్‌ కత్తెర హెనీ క్రిస్టినా అన్నారు. శనివారం గుంటూరులోని జడ్పీ సమావేశ మందిరంలో ఎంపీడీవోలతో సీఈవో ఎన్‌ఎస్‌వీబీ వసంతరాయుడు అధ్యక్షతన సమీక్ష సమావేశం జరిగింది. ముఖ్య అతిథిగా హాజరైన క్రిస్టినా మాట్లాడుతూ జిల్లాకు కొత్తగా వచ్చిన ఎంపీడీవోలు మండలాల్లోని జడ్పీ దుకాణాల సముదాయాలు, భూములను లీజుకు తీసుకున్న వారి నుంచి అద్దెలు వసూలు చేయాలన్నారు. అభివృద్ధి కార్యక్రమాల ప్రారంభ సమయంలో జడ్పీటీసీ, ఎంపీటీసీ సభ్యులకు ప్రొటోకాల్‌ పాటించాలని తెలిపారు. మండలాల్లో ఆడిట్‌ అభ్యంతరాలను పరిష్కరించాలన్నారు. జడ్పీ నిధులతో చేపట్టిన 495 అభివృద్ధి పనులను సకాలంలో పూర్తయ్యేలా దృష్టి సారించాలని వివరించారు. అనంతరం పదోన్నతి పొందిన పరిపాలన అధికారులు, సీనియర్‌ అసిసెంట్లు, జూనియర్‌ అసిస్టెంట్లతో పాటు కారుణ్య నియామక విధానం, బ్యాక్‌లాగ్‌ పోస్టులకు ఎంపికైన అభ్యర్థులకు ఉద్యోగ నియామక ఉత్తర్వులను ఛైర్‌పర్సన్‌ క్రిస్టినా, సీఈవో వసంతరాయుడు అందజేశారు.