కల్లాల్లో ఆరబోసిన 5 క్వింటాళ్ల మిర్చి చోరీ

బాధితుడిని పరామర్శిస్తున్న రైతు సంఘం నేతలు

వినుకొండ రూరల్‌, న్యూస్‌టుడే : వెల్లటూరు రోడ్డులోని గుడ్‌ షెపర్డ్‌ పాఠశాల వెనుక పొలంలో ఆరబెట్టిన 5 క్వింటాళ్ల మిర్చిని గుర్తు తెలియని వ్యక్తులు శుక్రవారం రాత్రి దొంగిలించారని రైతు నకరికంటి చిన్న ఖాసిం తెలిపారు. బాధితుడి వివరాల మేరకు మూడెకరాలు కౌలుకు తీసుకుని మిర్చి పంటను సాగు చేశారు. తొలి కోతలో వచ్చిన 12 క్వింటాళ్ల తేజ రకం మిర్చిని కల్లంలో ఆరబెట్టారు. రాత్రి 11 గంటల వరకు కాపలాఉండి తరువాత ఆయన ఇంటికి వెళ్లాడు. వేకువనే పొలం వద్దకు రాగా, సుమారు 5 క్వింటాళ్లకు పైగా చోరీ చేశారని బాధితుడు వాపోయాడు. సమాచారం తెలిసి ఏపీ రైతు సంఘం జిల్లా కార్యదర్శి రాము రైతును పరామర్శించి అండగా ఉంటామని భరోసానిచ్చారు. దొంగతనాలు ఎక్కువగా జరుగుతున్నాయని పోలీసులు రాత్రిపూట గస్తీ ఏర్పాటు చేసి ఇటువంటి సంఘటనలు పునరావృతం కాకుండా చూడాలని పేర్కొన్నారు.