ఈసీ నిబంధనల మేరకే పోస్టల్‌ బ్యాలెట్‌

మాట్లాడుతున్న కలెక్టర్‌ శివశంకర్‌

నరసరావుపేట అర్బన్‌: పోస్టల్‌ బ్యాలెట్‌ విషయంలో ఎన్నికల సంఘం నిబంధనలు పాటించాలని జిల్లా ఎన్నికల అధికారి, కలెక్టర్‌ శివశంకర్‌ అన్నారు. కలెక్టరేట్‌లో ఆదివారం నియోజకవర్గ ఆర్వోలతో వెబెక్స్‌ ద్వారా సమీక్ష నిర్వహించారు. ఆయన మాట్లాడుతూ ఎన్నికల విధుల్లో ఉన్న వారికి పోస్టల్‌ బ్యాలెట్‌కు దరఖాస్తులు అందించేందుకు 26 వరకు గడువు ఇచ్చినట్లు తెలిపారు. ఇతర జిల్లాల్లో ఓట్లు ఉన్న వారికి అమరావతిలోని సచివాలయంలో మూడు ఎక్ఛేంజీలు ఏర్పాటు చేస్తున్నట్లు వెల్లడించారు. స్థానికంగా ఓట్లు ఉన్న ఎన్నికల సిబ్బంది, అత్యవసర సేవల్లో ఉండేవారు పోస్టల్‌ బ్యాలెట్‌కు అర్హులని తెలిపారు. ఆర్వో కార్యాలయాల్లో ఏర్పాటు చేసిన హెల్ప్‌డెస్క్‌ల వద్ద దరఖాస్తులు అందజేయాలన్నారు. పోస్టల్‌ బ్యాలెట్‌ పోలింగ్‌ మే 5, 6, 7 తేదీల్లో నిర్వహిస్తామన్నారు. 5న పోలింగ్‌ అధికారులు, సహాయ పోలింగ్‌ అధికారులు, సూక్ష్మపరిశీలకులు, 6న పోలీస్‌ సిబ్బంది, 7న అత్యవసర సేవల ఉద్యోగులు ఓటుహక్కు వినియోగించుకోవాలన్నారు. జిల్లా వెలుపల ఓటర్లుగా ఉన్న ఉద్యోగులు అమరావతి సచివాలయంలో 28న ఓటర్ల మార్పిడికి సంబంధించి ఫారం- 12 సమర్పించాలన్నారు.  శిక్షణ కలెక్టర్‌ కల్పశ్రీ, డీఆర్వో వినాయకం పాల్గొన్నారు.