Cheating: క్యూఆర్‌ కోడ్‌ మార్చేసి రూ.4 కోట్లు స్వాహా

ఈనాడు- హైదరాబాద్‌: ఓ ప్రైవేటు సంస్థలో పనిచేసే ఉద్యోగులు క్యూఆర్‌ కోడ్‌లు మార్చేసి రూ.4.15 కోట్లు కొట్టేశారు. నగరంలోని కొండాపూర్‌లో ఇస్తారా పార్క్స్‌ ప్రైవేట్‌ లిమిటెడ్‌ సంస్థ ‘కోలివింగ్‌ ప్రాపర్టీస్‌’ పేరుతో ఒంటరిగా ఉండే ఉద్యోగుల కోసం అద్దె గృహాలు నిర్వహిస్తోంది. ఇందులో పనిచేసే ఉద్యోగులు.. వినియోగదారులు డిజిటల్‌ విధానంలో చెల్లించే సొమ్మును సంస్థ క్యూఆర్‌ కోడ్‌ ద్వారా మాత్రమే స్వీకరించాలి. ఇవి నేరుగా సంస్థ బ్యాంకు ఖాతాలో జమవుతాయి. 15 మంది ఉద్యోగులు మాత్రం  వ్యక్తిగత బ్యాంకులకు సంబంధించిన క్యూఆర్‌ కోడ్‌కు చెల్లించాలని సూచించేవారు. ఇలా కొన్ని నెలల వ్యవధిలో రూ.4.15 కోట్లు సొంత ఖాతాల్లోకి మళ్లించారు. ఆడిట్‌ నిర్వహిస్తున్న సమయంలో ఈ మోసం బయటపడింది. నిందితులపై చర్యలు తీసుకోవాలని కోరుతూ ఈవోడబ్ల్యూ పోలీసులకు యాజమాన్యం ఫిర్యాదు చేసింది.