స్టాక్‌ సలహాలంటూ నమ్మించి రూ.34 లక్షలు స్వాహా

ఈనాడు- హైదరాబాద్‌: షేర్ల క్రయవిక్రయాల్లో సాయం చేస్తామంటూ నమ్మించిన సైబర్‌ నేరగాళ్లు రూ.34 లక్షలు కొట్టేశారు. బాధితుడి ఫిర్యాదుతో నగర సైబర్‌క్రైమ్‌ పోలీసులు కేసు నమోదుచేసి దర్యాప్తు చేస్తున్నారు. నగరానికి చెందిన ప్రైవేటు ఉద్యోగి(52)కి స్టాక్‌ ట్రేడింగ్‌ సలహాలిస్తామంటూ ఇటీవల వాట్సాప్‌లో సందేశం వచ్చింది. ఆ నంబరులో సంప్రదించగా.. సైబర్‌ నేరగాళ్లు అతడ్ని దాదాపు 200 మంది ఉన్న వాట్సాప్‌ గ్రూపులో చేర్చారు. ఎల్‌కేపీఎస్‌ఎల్‌ యాప్‌ ద్వారా షేర్ల క్రయవిక్రయాలు చేయాలని సూచించగా.. బాధితుడు అలాగే చేశాడు. తర్వాత పుల్‌అప్‌షేర్లు కొనుగోలు చేయించి, కొంతమేర లాభం వచ్చినట్లు చూపించారు. బాధితుడి అనుమతి లేకుండా రూ.1.26 లక్షల విలువైన 1500 షేర్లను అతని పేరిట బదలాయించారు.  ఆ తర్వాత మరో 10వేల షేర్లు బదిలీ చేసి రూ.20 లక్షల లాభం వచ్చినట్లు యాప్‌లో చూపించారు. తమకు రూ.34లక్షలు ఇవ్వాలని, లేకపోతే ట్రేడింగ్‌ ఖాతా బ్లాక్‌ చేసి, అందులో ఉన్న రూ.10.96 లక్షలు తీసుకునే వీల్లేకుండా చేస్తామన్నారు. దీంతో బాధితుడు రూ.34 లక్షలు పంపాడు. తర్వాత వారి నుంచి స్పందన లేకపోవడంతో పోలీసులకు ఫిర్యాదు చేశాడు.