అత్యధిక ఎంపీ స్థానాల్లో గెలుస్తాం: కాంగ్రెస్‌

రోహిణ్‌రెడ్డిని సత్కరించిన యాసిన్‌ షరీఫ్‌, చిత్రంలో ముస్లిం మైనార్టీ నేతలు

అంబర్‌పేట, న్యూస్‌టుడే: లోక్‌సభ ఎన్నికలలో ఈ దఫా అత్యధిక ఎంపీ స్థానాలను కాంగ్రెస్‌ కైవసం చేసుకుంటుందని ఆ పార్టీ ఖైరతాబాద్‌ జిల్లా అధ్యక్షుడు రోహిణ్‌రెడ్డి ధీమా వ్యక్తం చేశారు. మతతత్వ భాజపా, ప్రజా సంక్షేమాన్ని విస్మరించిన భారాసలకు ఎన్నికల్లో గుణపాఠం తప్పదని హెచ్చరించారు. ఆదివారం అంబర్‌పేటకు చెందిన కాంగ్రెస్‌ మైనార్టీ విభాగం నాయకుడు, జిల్లా ఛైర్మన్‌గా నూతనంగా నియమితులైన యాసిన్‌ షరీఫ్‌ సన్మానించిన సందర్భంగా ఆయన మాట్లాడారు. ‘ఆరు గ్యారంటీ’ల్లో భాగంగా మహిళలకు ఆర్టీసీ బస్సుల్లో ఉచిత ప్రయాణం, 200 యూనిట్ల ఉచిత విద్యుత్‌, రూ. 500కే వంటగ్యాస్‌ సిలిండర్‌ పథకాలను తమ ప్రభుత్వం అమలు చేస్తోందని తెలిపారు. మిగిలిన వాటి అమలుపైనా దృష్టి సారించామన్నారు. ఈ విషయంలో విపక్షాలు రాద్ధాంతం చేయడం తగదని హితవు పలికారు.