మోసంతో మూడో పెళ్లిపై ఫిర్యాదు

దిల్‌సుఖ్‌నగర్, న్యూస్‌టుడే: ముందుగా రెండు పెళ్లిళ్లయిన విషయం చెప్పకుండా తనను కూడా పెళ్లి చేసుకుని మోసం చేశాడంటూ బాధితురాలు సరూర్‌నగర్‌ పోలీసులను ఆశ్రయించింది. శుక్రవారం భర్త ఇంటి ముందు ఆమె నిరసనకు దిగింది. ఇన్‌స్పెక్టరు సైదిరెడ్డి తెలిపిన వివరాలివీ.. దిల్‌సుఖ్‌నగర్‌ పీఅండ్‌టీ కాలనీకి చెందిన మధు నారాయణగూడలో స్పీచ్‌ థెరపిస్టుగా పనిచేస్తాడు. అక్కడే పరిచయమైన లావణ్యను పెళ్లి చేసుకున్నాడు. మధుకు గతంలోనే పెళ్లి జరిగింది. భార్య మృతి చెందగా ఆమె సోదరినే రెండో వివాహం చేసుకున్నాడు. ఈ విషయాలేవీ చెప్పకుండా లావణ్యను మూడో వివాహం చేసుకుని సనత్‌నగర్‌లో కాపురం పెట్టాడు. విషయం తెలుసుకున్న బాధితురాలు పోలీసులకు ఫిర్యాదు చేసింది. పరారీలో ఉన్న మధు కోసం గాలిస్తున్నారు.