బోటు షికారు.. పోటెత్తిన హుషారు

ఈనాడు, హైదరాబాద్‌: అసలే వేసవి సెలవులు.. అందులోనూ వాతావరణం చల్లగా మారి నాలుగైదు రోజులుగా చినుకులు పలకరిస్తున్నాయి. దీంతో నగరానికి పర్యాటకులు పోటెత్తడంతో సాగర తీరంలో సందర్శకుల తాకిడి బాగా పెరిగింది. కరోనా తర్వాత రికార్డు స్థాయిలో సందర్శకులు బోటు షికారు చేశారని లుంబినీ బోటింగ్‌ యూనిట్‌ మేనేజర్‌ జి.ప్రభుదాస్‌ పేర్కొన్నారు. శనివారం 10 వేల మంది బోటు షికారు చేయగా ఆదివారం ఆ సంఖ్య 13 వేలకు చేరింది. శనివారం 10,200 మంది, ఆదివారం ఏకంగా 13,350 మంది బోటు షికారు చేయడంతో గత రికార్డులన్నీ బద్దలకొట్టాయి. శనివారం రూ.9లక్షలకు పైగా ఆదాయం రాగా ఆదివారం రూ.13.52 లక్షల ఆదాయం వచ్చిందని జి.ప్రభుదాస్‌ తెలిపారు. కరోనా తర్వాత ఇంత ఆదాయం రావడం ఇదే ప్రథమమన్నారు.