తాగునీటికి ఆరాటం.. ప్రాణాలతో చెలగాటం

కూకట్‌పల్లి: తాగునీటి కోసం ప్రాణాలతో చెలగాటమాడుతున్న పరిస్థితులకు ఈ చిత్రాలు అద్దం పడుతున్నాయి. బాలానగర్‌ డివిజన్‌ రాజీవ్‌గాంధీనగర్‌లోని నాలాను ఆనుకొని కొన్ని కుటుంబాలు నివసిస్తున్నాయి. వీరు నాలా అవతల బస్తీలో ఉన్న మంజీరా పైపులైన్‌ నుంచి తాగునీటి కనెక్షన్లు తీసుకున్నారు. ఈ పైపులు నాలా పైనుంచి వేలాడుతూ ఇవతలి వైపున్న నివాసితుల ఇళ్లకు చేరుతాయి. వర్షం పడినప్పుడు ఈ పైపుల జాయింట్లు ఊడిపోతుండడం.. స్థానికులు నాలాలోకి దిగి.. వాటిని తాళ్లతో కట్టడం, పరిపాటి. ఆదివారం కురిసిన భారీ వర్షం కారణంగా వరద ఉద్ధృతికి పైపులు ఊడిపోవడంతో చేసేదేమీలేక స్థానికులు ప్రాణాలను పణంగా పెట్టి నాలాలో దిగి పైపులను సరిచేశారు. ఈ విషయాన్ని ‘ఈనాడు’ జలమండలి డీజీఎం వెంకటేశ్వర్లు దృష్టికి తీసుకెళ్లగా.. ఆయన సోమవారం పరిశీలించి ఐదు కనెక్షన్లు ఇలా ఉన్నాయని.. వాటి బిల్లులు కూడా పరిశీలిస్తున్నామని చెప్పారు.