పూడూరులో ఎన్‌ఐఏ సోదాల కలకలం

వికారాబాద్, న్యూస్‌టుడే: వికారాబాద్‌ జిల్లా పూడూరు మండలంలో మంగళవారం జాతీయ పరిశోధన సంస్థ(ఎన్‌ఐఏ) సోదాలు జరిపి ఓ యువకుణ్ని అదుపులోకి తీసుకోవడం జిల్లాలో కలకలం రేపింది. కర్ణాటక రాజధాని బెంగళూర్‌లోని రామేశ్వరం కేఎఫ్‌లో ఈ ఏడాది మార్చి 1వ తేదీన జరిగిన బాంబు పేలుళ్ల కేసుకు సంబంధించి నిందితులను ఇప్పటికే ఎన్‌ఐఏ అదుపులోకి తీసుకున్న విషయం విదితమే. వారిచ్చిన సమాచారంతోనే పూడూరు మండలంలోని ఓ గ్రామంలో సోదాలు నిర్వహించిన ఆ సంస్థ నిందితులతో సంబంధం ఉన్న మహారాష్ట్రకు చెందిన ఓ యువకుణ్ని అదుపులోకి తీసుకున్నట్లు సమాచారం. ఆ యువకుడు మండల శివారులో ఓ వ్యవసాయ క్షేత్రంలో పనిచేస్తున్నట్లు తెలిసింది. రామేశ్వరం కేఎఫ్‌ పేలుళ్ల నిందితులకు ఈ యువకుడు నిధులు సమకూర్చడంతోపాటు ఆశ్రయం కల్పించారన్న ఆరోపణలు విన్పిస్తున్నాయి. దీన్ని అధికారికంగా ఎవరూ ధ్రువీకరించలేదు. అదుపులోకి తీసుకున్నది వాస్తవమేనని, వివరాలు తెలియవని పేరు చెప్పడానికి నిరాకరించిన ఓ పోలీసు అధికారి తెలిపారు.

షెల్టర్‌ జోన్‌గా భావించి..

వికారాబాద్‌ ప్రాంతంలో ఉగ్ర కదలికలు ఇదే తొలిసారి కాదు. ఆరేళ్ల కిందట ఎన్‌ఐఏకు పట్టుబడ్డ ఓ ఐసిస్‌ ఉగ్రవాది వికారాబాద్‌ జిల్లాను షెల్టర్‌ జోన్‌గా భావించి అనంతగిరి అటవీ ప్రాంతంలో తుపాకీ పేల్చడంలో వారం రోజుల పాటు శిక్షణ తీసుకున్నట్లు తేలడం అప్పట్లో తీవ్ర సంచలనం రేపింది. అనంతగిరిలో భద్రత డొల్లతనాన్ని ఆ ఘటన ఎత్తి చూపినట్లయ్యింది. దీంతో వారాంతపు, ఇతర సెలవు దినాల్లో అనంతగిరి అందాలను తిలకించడానికి వేల సంఖ్యలో వచ్చే పర్యాటకుల భద్రత, అసాంఘిక కార్యకలాపాల నియంత్రణపై పోలీసులు ప్రత్యేక దృష్టి సారించారు. అప్పట్లో ఏర్పాటు చేసిన ఐదుగురు పోలీసులతో కూడిన ఓ సంచార గస్తీ బృందం ఇప్పటికీ పహారా కాస్తోంది.