ఒంటరి వ్యక్తులే లక్ష్యంగా సెల్‌ఫోన్ల అపహరణ

రెజిమెంటల్‌బజార్, న్యూస్‌టుడే: ఒంటరి వ్యక్తులను లక్ష్యంగా చేసుకొని ఫోన్లను ఎత్తుకెళ్తున్న ముఠాలోని ఇద్దరు యువకులు, నలుగురు మైనర్లతో పాటు ఫోన్లను కొనుగోలు చేసిన ముగ్గురిని ఉత్తర మండలం టాస్క్‌ఫోర్స్‌ పోలీసులు అరెస్ట్‌ చేశారు. హైదరాబాద్‌ టాస్క్‌ఫోర్స్‌ డీసీపీ ఎస్‌.రష్మీ పెరుమాళ్‌ వివరాల ప్రకారం... నేరేడుమెట్‌ వాసి రోహన్‌రాజ్‌(19), సికింద్రాబాద్‌ తిరుమలగిరి వాసి వి.డి.వివియన్‌ రాజ్‌(19)లు స్నేహితులు. జల్సాలకు అలవాటుపడిన వీరు తిరుమలగిరికి చెందిన నలుగురు మైనర్లను కలుపుకొని నగరంలోని పలు ప్రాంతాల్లో రాత్రిళ్లు, తెల్లవారు జామున బైక్‌లపై వెళ్తూ.. ఒంటరిగా నడుచుంటూ వెళ్తూ సెల్‌ఫోన్‌ మాట్లాడుతుండే వారిని లక్ష్యంగా చేసుకుంటారు. వారి చేతిలోని ఫోన్‌ లాక్కొని ఉడాయిస్తున్నారు. నేరేడుమెట్, తిరుమలగిరి ప్రాంతాల్లో బాధితుల నుంచి ఫిర్యాదులు రావడంతో పోలీసులు నిఘా పెట్టారు.  మంగళవారం ఉదయం నిందితులను సికింద్రాబాద్‌లో అదుపులోకి తీసుకున్నారు. నిందితులతో పాటు ఫోన్లు కొనుగోలు చేసిన యువకులతో కలిపి 9మందిని రిమాండ్‌కు తరలించారు.