రైలు నుంచి దూకిన బాలిక..చికిత్స పొందుతూ మృతి

కాచిగూడ, న్యూస్‌టుడే: కదులుతున్న రైలు నుంచి దూకడంతో తీవ్రంగా గాయపడి చికిత్స పొందుతున్న బాలిక మృతి చెందింది. కాచిగూడ రైల్వే ఇన్‌స్పెక్టర్‌ ఎల్లప్ప, హెడ్‌కానిస్టేబుల్‌ సమ్మయ్య వివరాల ప్రకారం శనివారం కాచిగూడ స్టేషన్‌ నుంచి లింగంపల్లికి వెళుతూ ఎంఎంటీఎస్‌ రైలు ఎక్కే క్రమంలో ప్రమాదవశాత్తు రమేష్‌ కిందపడిపోయాడు. దీన్ని గుర్తించిన ఆయన కుమార్తెలు పూజ, విజయ(13)లు వెంటనే రైలు నుంచి ప్లాట్‌ఫాంపైకి దూకిన విషయం విదితమే. ఈ క్రమంలో తీవ్ర గాయాలపాలైన విజయను గాంధీ ఆసుపత్రికి తరలించారు. నాటి నుంచి అక్కడే చికిత్స పొందుతున్న ఆమె బుధవారం మృతి చెందింది. రైల్వే పోలీసులు కేసు నమోదు చేసి దర్యాప్తు చేస్తున్నారు.