కిరణ్‌ ఫెర్టిలిటీ సర్వీసెస్‌కు మొట్టికాయలు

ఈనాడు, హైదరాబాద్‌: ఒప్పందం ప్రకారం నడుచుకోకుండా అదనంగా డబ్బు వసూలు చేసిన కిరణ్‌ ఫెర్టిలిటీ సర్వీసెస్‌ ప్రైవేటు లిమిటెడ్‌కు హైదరాబాద్‌ కమిషన్‌-2 మొట్టికాయలు వేసింది. విశాఖపట్నానికి చెందిన విజయ్‌కుమార్‌కు ప్రతివాద కిరణ్‌ ఫెర్టిలిటీ సర్వీసెస్‌ ప్రైవేటు లిమిటెడ్‌కు మధ్య ఐవీఎఫ్‌ పద్ధతిలో సరోగసీకి 2017 డిసెంబరులో ఒప్పందం కుదిరింది. ఈ ప్రక్రియ అంతా కెన్యాలో మొంబాసాలో జరగాలన్నది ఫిర్యాదీ ప్రధాన అభ్యర్థన. ఇందుకు 40,500 యూఎస్‌ డాలర్లు చెల్లించేలా అంగీకరించారు. 2018 జనవరి నుంచి డిసెంబరు వరకు వేర్వేరు వాయిదాల్లో  ఫిర్యాదీ ఈ మొత్తాన్ని చెల్లించారు. ఈ ప్రక్రియను పర్యవేక్షించేందుకు ప్రతివాద సంస్థకు చెందిన ఫిజీషియన్‌ను నియమించారు. అయితే డెలివరీ సమయంలో ప్రతివాద సంస్థ 3,500 యూఎస్‌ డాలర్లు అదనంగా వసూలు చేయడంతో పాటు ఒప్పందానికి విరుద్ధంగా హాస్పిటల్‌ ఛార్జీలు వసూలు చేశారు. బిడ్డ జననం తర్వాత జనరల్‌ వార్డుకు తరలించారని ఫిర్యాదీ కమిషన్‌కు తెలిపారు. ఇందుకోసం ప్రతి రోజూ 150 యూఎస్‌ డాలర్లు వసూలు చేశారని పేర్కొన్నారు. విచారించిన కమిషన్‌ ఫిర్యాదీ నుంచి అదనంగా వసూలు చేసిన డబ్బు రూ.2,62,500 రీఫండ్‌ చేయాలని, పరిహారంగా రూ.1,00,000, కేసు ఖర్చులు రూ.10 వేలు ఇవ్వాలని ఆదేశించింది.