రైళ్లలో మత్తుపదార్థాల రవాణా

అంతర్రాష్ట్ర  నిందితుడి అరెస్ట్‌

రెజిమెంటల్‌బజార్‌: రైళ్లలో ప్రయాణికుల్లా నటిస్తూ మత్తుపదార్థాలు రవాణా చేస్తున్న ముఠా గుట్టును సికింద్రాబాద్‌ రైల్వే పోలీసులు బట్టబయలు చేశారు. ఆరుగురు ముఠా సభ్యుల్లో ఒకరిని అరెస్ట్‌ చేశారు. రూ.15.50 లక్షల విలువైన 62 కిలోల గంజాయిని స్వాధీనం చేసుకున్నారు. సోమవారం సికింద్రాబాద్‌ రైల్వేస్టేషన్‌లో రైల్వే ఇన్‌స్పెక్టర్లు కిరణ్‌కుమార్, సారస్వత్, ఎస్సై ఎం.ఏ.మజీద్, హెడ్‌ కానిస్టేబుళ్లు సీతారాములు, నాగుబాషాతో కలసి డీఎస్పీ ఎస్‌.ఎన్‌.జావెద్‌ మీడియాకు వివరాలు వెల్లడించారు. ఒడిశాకు చెందిన మిహర్, ఛిడా, చంద్‌కుమార్‌నాయక్‌(30), మరో ఇద్దరు కలసి ఒడిశాలోని మోహన ప్రాంతంలో గంజాయి కొనుగోలు చేస్తుంటారు. దాన్ని రైళ్లలో వివిధ రాష్ట్రాలకు తరలిస్తారు. ఆదివారం ఒడిషా నుంచి మహారాష్ట్రలోని నాంధేడ్‌కు బయల్దేరారు. రైల్వే ఎస్పీ షేక్‌ సలీమా ఆదేశాలతో సోమవారం ఉదయం సికింద్రాబాద్‌ రైల్వే పోలీసుల తనిఖీలో చాంద్‌కుమార్‌నాయక్‌ పట్టుబడ్డాడు. అతడి నుంచి 62 కిలోల గంజాయి స్వాధీనం చేసుకున్నారు. నిందితుడిని అరెస్ట్‌ చేశారు. ముఠాలో ఐదుగురు పారిపోయారు.