అదుపుతప్పి చెట్టును ఢీకొన్న కారు.. నిండు గర్భిణి, మరో బాలుడి మృతి

కడుపులోనే  కన్ను మూసిన కవలలు
ఆరుగురికి గాయాలు

యాచారం, న్యూస్‌టుడే: వేగంగా వెళ్తున్న కారు అదుపు తప్పి చెట్టును ఢీకొనడంతో నిండు గర్భిణితో పాటు ఐదేెళ్ల బాలుడు మృతి చెందగా మరో ఆరుగురికి గాయాలయ్యాయి. రంగారెడ్డి జిల్లా యాచారం ఠాణా పరిధిలో ఆదివారం ఈ ప్రమాదం చోటు చేసుకుంది. పోలీసులు, స్థానికుల కథనం ప్రకారం.. నల్లగొండ జిల్లా నాంపల్లి మండలం ఒడ్డెపల్లికి చెందిన పాస్టర్‌ అరుణ్‌కుమార్‌, రీతు(22) దంపతులు, మరో పాస్టర్‌ సుందర్‌, రాధిక దంపతులు వీరి సంతానం శ్యాం(5), బ్లెస్సీ(3)లతో పాటు వారి బంధువులు జంగమ్మ, ఇస్తారి జీవనోపాధి కోసం నగరంలో నివాసం ఉంటున్నారు. అరుణ్‌కుమార్‌ కారులో వీరంతా ఆదివారం స్వగ్రామం ఒడ్డెపల్లి చర్చికి వెళ్లారు. సాయంత్రం నగరానికి  తిరిగి వస్తుండగా మాల్‌ మార్కెట్‌ సమీపంలో వీరి కారు అదుపు తప్పి చెట్టును ఢీకొంది. దీంతో తీవ్రంగా గాయపడిన వీరిని నగరంలోని ప్రైవేట్‌ ఆసుపత్రికి తరలిస్తుండగా మార్గమధ్యలో 9 నెలల గర్భిణి రీతు, బాలుడు శ్యామ్‌ మృతి చెందారు. రీతు గర్భంలోని కవలలు కూడా మృతి చెందినట్లు వైద్యులు చెప్పారు. గాయపడిన ఆరుగురు చికిత్స పొందుతున్నారు. వీరిలో బ్లెస్సీ పరిస్థితి విషమంగా ఉందని పోలీసులు తెలిపారు. యాచారం పోలీసులు కేసు నమోదు చేసి దర్యాప్తు చేస్తున్నారు.