అమ్మో.. నవంబరు 30

అభ్యర్థుల గుండెల్లో హడల్‌

ఎన్నికల రోజు సమీపించడంతో అభ్యర్థుల గుండెల్లో రైళ్లు పరిగెడుతున్నాయి.. ఇన్నాళ్లు ప్రచారం నిర్వహించినా నియోజకవర్గంలో అప్పటి వరకు పలకరించని ఓటర్లు ఎటు వైపు మొగ్గుతారోనని ఆందోళన చెందుతున్నారు. ఇంటింటి ప్రచారం, మహిళా, యువజన సంఘాలు, సామాజిక వర్గాలవారీగా ప్రత్యేక సమావేశాలు, అపార్ట్‌మెంట్‌లు, కాలనీ సంక్షేమ సంఘాల్లో ప్రచారం సాగించినా.. ఇంకా పర్యటించాల్సిన ప్రాంతాలు మిగిలి ఉండటంతో తక్కువ సమయంలో వారిని ఎలా ప్రసన్నం చేసుకోవాలని ఆందోళన చెందుతున్నారు. గంపగుత్తగా పడే ఓటు బ్యాంకును తమ గుప్పిట్లో పెట్టుకున్నా.. చీలిపోయే ఓట్లు, తటస్థుల మనోగతం ఏంటో తెలియక తికమకపడుతున్నారు.చివరి అంకంలో పోల్‌ మేనేజ్‌మెంట్‌కు ఖర్చు సైతం తడిసి మోపెడయ్యేలా ఉండటం, గెలుపు అవకాశాలు దోబూచులాడుతుండటంతో అభ్యర్థులు తీవ్ర ఆందోళనకు గురవుతున్నారు. తామింకా కలవని ఓటర్లును తమవైపు తిప్పుకోవడమనేది వారికి సవాల్‌గా మారింది.

ఈనాడు, హైదరాబాద్‌

డబ్బు పంచారని ఫిర్యాదు

ఫిలింనగర్‌: జూబ్లీహిల్స్‌లో డబ్బు పంపిణీ చేస్తున్నారంటూ ఎంఐఎం నేతలు ఫిర్యాదుచేశారు. మంగళవారం సాయంత్రం అజహరుద్దీన్‌ షేక్‌పేట బృందావన్‌కాలనీలో ఓ ఇంటికి వెళ్లారు. గమనించిన ఎంఐఎం నేతలు.. కాంగ్రెస్‌ అభ్యర్థి డబ్బు పంచుతున్నారంటూ పోలీసులకు ఫిర్యాదు చేశారు. వారొచ్చి తనిఖీలు చేసి ఆయన సాధారణంగానే వచ్చినట్లు తేల్చారు.